.ఇండియన్‌ ఫిలిం ఇండస్ట్రీలోనే అత్యంత ప్రతిష్ఠాత్మకంగా భావించే దాదా సాహెబ్ ఫాల్కే ఫిలిం ఫెస్టివల్ సోమవారం రాత్రి ముంబైలో అట్టహాసంగా జరిగింది. ఈ సందర్భంగా ‘ఆర్ఆర్ఆర్’ సినిమా ‘ఫిలిం ఆఫ్‌ ది ఇయర్’ అవార్డు దక్కించుకుంది. కన్నడ చిత్రసీమ నుంచి చిన్న సినిమాగా విడుదలై దేశవ్యాప్తంగా సంచలన విజయం అందుకున్న ‘కాంతార’ సినిమాకు కూడా అవార్డు వచ్చింది. ఈ సినిమాలో నటనకు గానూ ‘మోస్ట్‌ ప్రామిసింగ్‌ యాక్టర్‌’ అవార్డును రిషబ్‌ శెట్టి దక్కించుకున్నాడు. ఉత్తమ నటుడిగా రణ్‌బీర్ కపూర్‌(బ్రహ్మాస్త-1), ఉత్తమ నటిగా అలియా భట్‌(గంగూబాయి కాఠియావాడి) చిత్రాలకు పురస్కారాలు అందుకున్నారు. ఉత్తమ చిత్రంగా ది ‘కశ్మీర్ ఫైల్స్’ అవార్డు దక్కింది. చిత్ర పరిశ్రమకు అత్యుత్తమ సేవలందించినందుకు గానూ 2023 సంవత్సరానికి దాదా సాహెబ్ ఇంటర్నేషనల్ ఫిల్మ్ ఫెస్టివల్ అవార్డును రేఖ అందుకున్నారు.
